Gen 32 | ATA | STEP | Lavani mulutu sou mulivu mulai, la Iakovo kalumo mulutu sou mulai e lexe anu ulilivu ulai no anu. Mumuamua'i xe mulai la ta angelo noxou Lataua mixalisou.

a 32:12Tav 22:17

c 32:28Tav 35:10

d 32:29Kis 13:17-18

Genesis 32

Iakovo Musosovosi'a ta mimii Noxou Vimou Tila Esau

1 Lavani mulutu sou mulivu mulai, la Iakovo kalumo mulutu sou mulai e lexe anu ulilivu ulai no anu. Mumuamua'i xe mulai la ta angelo noxou Lataua mixalisou. 2 Xe Iakovo mumaisi'a la muvikala aloxo 'o, “Tuala ano 'o noxou Lataua.” La sou anu mumoxo'u lia xalee ane ne, lexe Maanaimu. 3 Xe Iakovo muavuti la mupalusi'a ta mitema se'i sou milai noxou vimou Esau no tuala vile ilemolu lexe ne Seiru no xalee lia ne Edomu. 4 Milutu sou milai, la anu mulosi'a vaivaikala aloxo 'o, “Ngalai xe ngaxali noxou Esau itema tila noxilo la ngavikalanu lexe eni Iakovo, elai exolu maxuvee misevile noxou Lavani, mo ane mune'e mutalo vaimomo 'o. 5 Ngavikalanu kalumo lexe eni alivu unene'e 'o eni anene'e vitanisi uasi, eni ta mitema mo ta sema sou xaixai noxilo a noxi'a tanene'e 'o. Mo ta kauxeni ilo'a ta mee mo ta donki mo ta sipsip kalumo. Eni ekalanu anaxo une'e noxine nini tatila noxilo lexe eni ane'e axali noxine la nini opoone laixeilosi.”

6 Xe ta mitema ane anu Iakovo mupalusi'a ne milai xe milivu mixali, la mivikalanu aloxo 'o, “Nexi telailixu vaikalameni noxou vivine Esau, la muvikalanexi lexe anu une'e sou ualaxene no vote'i. Ilo'a ta mitema itemaxu mavulovexa tamei (400).” 7 Iakovo mulomu aloxo ne la mumama'u misevile la tanu kalaua mo xavutalau ne laixe uasi. Xe muavuti la mukalipala'ane'i ta mitema noxou sou xaixai ilo'a ta sipsip mo ta mee mo ta kau mo ta kameli ilo'a ta donki la'oluxa'a tamei. 8 Ka muvikala aloxo 'o, “Lexe Esau une'e xe umasaxa lexe uxalixu 'oto'oto vile, la anu ilo'a ta mitema noxilo la'oluxa'a ano 'o i'oto ia, ane'i la'oluxa'a ano 'o i'ume.”

9 Xe muavuti la mukilaka aloxo 'o, “Lataua noxou Avalaamu, eni xasilo mo nini Lataua noxou Aisaki, eni mamilo, nalomusou linga noxilo. IAUE, nini nevikalaleli lexe eni alivu ulai noxi'a ta milemileli no tualasilo ne, la nini naalusilo sou eni axali itema sou lavuluti. 10 Lataua eni amitema sou xaixai noxine. Ia eni amitema vile laixe uasi. Ia nini tanenixo la ne'oxo laixe noxilosi. No voxo ane eni exisa'isie lexa Ioridani sou elai exoo noxou Lavani ne, la ano'u mii vile no avolo sou elai ne uasi. Vilaxoxosi 'a ane eni enono'u sou evilaxoxu. Ia ane 'o ne, eni ane alivu une'e 'o noxi'a ta mitema xuxulusi'a tamei 'o. 11 Eni alingaine lexe nini nasu'ulileli mo sou mamu vivilo Esau une'e ualivulanexi. Eni amama'u misevile xo loxo io anu une'e usokou 'oto'oto vile, la uvexevexe ukalusi, la uve'a ta sema ilo'a ta 'ili'ili'a 'o kalumo. 12 ^aNexavutalanu vaikala e nini mene nevikalalelixu. Nevikala lexe nini naxoo noxilo mo naalusilo sou eni ta xasixasilo ilo'a ta 'ilusulusuleli ixali tavu'alo ili'i loxo io'iio'i no tasi'i, ia evile umomomo sou uitisi'a uasi.”

13 'Olovoxo la Iakovo ena miai xe loxo ne'iela, la anu Iakovo musosovosi'a ta kau ilo'a ta mee mo ta sipsip mo ta kameli mo ta donki se'i sou iu vimou Esau. 14 Itiitisi'a ta mimii ne aloxo 'o ta mee ta sema ne muno'a itemaxu mavulovexa vile (200). Xe ta mulu, la muno'a itemaxu vile. Ta sipsip ta sema la muno'a itemaxu mavulovexa vile (200) xe ta mulu la muno'a itemaxu vile (20). 15 Xe ta kameli ane misulu mo ta 'ili'ili'a a no tava'a ne, muno'a mavulovexa tatalu (30). Xe ta kau la muno'a mavulovexa tami'a (40) ane sema, xe ta mulu mavulovexa. Ta donki la muno'a ta sema itemaxu vile (20) xe ta mulu mavulovexa (10). 16 Xe muavuti la musosovosi'a ta mitema sou xaixai noxou sou vilevilesi isaxila'a ta mee ilo'a ta sipsip mo ta kameli mo ta kau ilo'a ta donki e anu Iakovo musosovosi'a sou lexe uitiu vimou Esau. Mu'italone'i ta mitema vilevile sou isaxila'a ta mimii la'oluxa'a vilevilesi ne mukalu la muvikalane'i aloxo 'o, “Maasi xe nenge'a talutu sou talai, la ngingi ngauli, ia ngasaxila'a Esau ta miu ne mo sou mamu imua'i ipita. Ngamuxaxu taitaiinu. Nini ane nasaxila'u la'oluxa'a vile, la nauli, ioxe anu ane uno'a noxou sou umulineni, la umuxaxu taiinu o ka sou uili'i no tumaline. Nga'oxo aloxo ne, la ulai utalo noxou ane sou uili'i.” 17 Xe muavuti la mulosi'a vaikala tamei sou. Muvikalanu itema sou xaixai noxou ane sou uulaxune'i aloxo 'o, “Nauli xe eni vivilo Esau uala xe une'e uxalisine xe utali'i lexe, ‘Nini namitema sou xaixai noxou ene'ei? Ia nalalai ne'ei 'o? Ta mimii te naoolene'i ne 'ena'ei ta miu?’ 18 Ioxe nini naavuti la navikalanu lexe, ‘Ta mii 'o, itema sou xaixai noxine Iakovo anu musovane'i mine'e noxine nini tila noxou lexe nini ta miimeni. Anu muitimeni vitanisi. Ia anu Iakovo a uili'i sio.’” 19 Musuku mune'e noxou itema sou xaixai noxou tamei sou mo tatalu sou la mulosi'a vaikala vilesisi aloxo ne. Mo ane'i ane tavu'alo mo mulai upee noxou ane ili'i ne, vaikala vilesisi anesi, ane anu muvikalane'ixu sou ikolinu tali'i noxou vimou Esau. 20 Xe muavuti la muvikalane'i la, “Vaikala vilesi anesi, lexe uxalisine xe utali'i aloxo ne la, ngakoli vilesisi aloxo ne. Ngaxavutalanu sou ngavikalanu lexe, ‘Ani, itema sou xaixai noxine a uili'i sio.’” Xe muavuti la muvikala lexe, “Male no anu xavutala ano 'osi la sou eni axolixoli no anu, la sou anu uxiunu tumalouxu 'ilixo masua e eni e'oxo noxou la sou anu la'iaxuilo no anu.” 21 Xe muavuti la musova iu vimou mimii muuli mulai noxou ia anu muxolu sou muai 'olovoxo vile la.

Iakovo Ilou Lataua Mi'oto'oto

22 No 'olovoxo la Iakovo muavuti la muno'a ta semasemau tamei ne ilo'a ta sema sou xaixai noxou tamei mo ta 'olu mulelia vile (11) milai mixisa'isou lexa Iavoku. 23 Mulailixa'a no lexa no xalee vile xe mukalu, la mulivu mune'e sou uvikalane'i ta mitema sou xaixai noxou sou itavulenu miumiu ulai no xalee lexa noxi'a ane'i ane miuli 'ole, 24 ^bia anusisi muxoxoo ne, xe no 'olovoxo la itema vile mune'e muxali noxou sou ilou mi'oto. Ilou mi'oto xoo mole lamana mukea. 25 Xe itema ne muxamuli loxo 'o la anu a xavixavinu ua, xe muavuti la mu'otunu Iakovo tanga'u no avolu la tanga'u muxatele. 26 Xe itema ne muavuti la muvikalanu Iakovo aloxo 'o, “Naxexeenu avone mo eni alai xo anu asou lamana ukea.” Iakovo muavuti la muvikalanu aloxo 'o, “Eni umomomo sou eni axexeenu avolo uasi. Lexe nini naalusilo 'o, la sou eni axexee avolo.” 27 Xe anu itema ne, muavuti la mutali'isou Iakovo aloxo 'o, “Ualasine loxovaa?” Xe Iakovo muavuti la mukolinu lexe, “Eni ualasilo lexe Iakovo.” 28 ^cXe anu itema ne muavuti la muvikalanu Iakovo, “Tava'u xo ngingi ngongou Lataua nge'oto mo ngongi'a ta mitema kalumo la nini netaloxolixa'a, la ualasine lexe Iakovo ne usu'a, ia ualasine lexe Isilaeli.” 29 ^dIakovo muxiu vaxa la mutali'isou itema ne lexe, “Nini ualasine 'ena'ei? Nalemolu noxilo.” La anu itema ne, mukolinu lexe, “Tava'u loxovaa la nini nemasaxa lexe nalavusou ualasilo?” Xe muavuti la mualusou Iakovo. 30 Xe Iakovo muavuti la muvikala lexe, “Vaimomo 'o eni emaisou Lataua iou, ia eni asoli uasi.” La sou mumoxo'u lia xalee se ane ne, lexe Penuelu. 31 Aso muxali mutelo, la Iakovo mulutu sou musukusou lia xalee ne sou mulukeluke mulai xo tanga'u mupee. 32 La sou musoko ane tatei ne mole ane mune'e mutalo vaimomo 'o ne, Iakovo ta 'olu'olu ilo'a ta xasoxasou mo ta 'ilusulusunu ne i'ou mii xiasinu no texesou 'o uasi xo itema e ane'i ilou mi'oto, la mu'otunu ane no tanga'u ne.